Friday 25 February 2011

soweli en kili

soweli en kili, tan A.Rackham

soweli loje pimeja li lukin e kili lili mute.
kili li pimeja li pona lukin.
soweli li wile moku e ona.
taso kili li lon palisa sewi.
tan ni la soweli li tawa sewi wawa.
tenpo mute la ona li tawa sewi wawa.
taso ona li ken ala kama jo e kili.
ona li tawa weka li toki e ni:
"kili ni li suwi ala. ona li ike moku".

jan Ote

Friday 18 February 2011

kala

kala suli en kala lili, tan jan Mika

kala suli li wile moku e kala lili mute. kala lili li tawa wawa tan kala suli. taso kala suli li kama jo e kala lili ali li moku e ona. ni li nasin mani.

kala lili mute li wan li utala e kala suli. kala suli li tawa wawa tan kala lili mute. kala lili ali li ken jo e lon pi utala ala. ni li nasin kulupu.

nasin mani li ike!

Friday 11 February 2011

sike wan

sike wan, tan Xander
jan Eta sewi li jo e sike mute.
jan Kasa li jo e sike mute li lon tomo kiwen.
jan Ana li jo e sike mute li moli.
jan lawa pimeja li jo e sike wan
li lon ma Moto pimeja.
sike wan li lawa e ali. sike wan li lukin e ma ali.
sike wan li kama jo e ali li wan e ali kepeken ike
lon ma Moto pimeja.

Friday 4 February 2011

ma tomo Pape

tomo palisa pi ma tomo Pape,
tan Abel Grimmer

jan ali li kepeken e toki sama. jan li kama tan nasin pi kama suno li kama tawa ma Sinale li awen lon ni. jan li toki e ni: "o kama! mi mute o pali e kiwen. o seli e ona." jan mute li toki e ni: "o kama! mi mute o pali e tomo mute e tomo palisa suli. sewi pi tomo palisa li lon sewi kon. nimi pi mi mute o kama suli! mi wile ala e ni: mi mute li lon ma ante mute." jan sewi Jawe li kama anpa li lukin e ma tomo e tomo palisa. jan sewi Jawe li toki e ni: "jan li lon ma wan li kepeken e toki sama li pali e tomo palisa. tenpo ni la ona li ken pali e ijo ike mute. mi wile tawa anpa li wile pakala e toki pi jan mute ni. mi wile e ni: jan li sona ala e toki pi jan ante." jan sewi Jawe li kama e ni: jan li lon ma mute li ken ala pali e tomo. nimi pi ma tomo ni li Pape tan ni: jan sewi Jawe li pakala e toki pi jan ali. jan sewi Jawe li tawa e jan tawa ma mute tan ma tomo Pape.